نـقطـــــة

3aziz 3eni said




نقطة ...

هى ابسط من نقطة لكن اقوى من فيضان واحد من سيف واحن من ام وارق من فراشة

وهنا نقطة ومن اول السطر

ايوة نقطة ومن اول السطر

يمكن تكون غريبة لكن هى نقطة اخر السطر وابتديت معاها سطر جديد......

كانت نقطة تحول جديدة كانت وهى مازالت جوايا اكبر نقطة وقفت عندها...

صدقونى كانت اكبر من الهرم او اكبر من السد حتى... ابتدى السطر يتخط ولسه بيبتدى يكمل وفجأة...............وقف

وقف مش بسبب نقطة جديدة لأ طبعا.... ولا بسبب ان النقطة كانت اضعف من التيار لأ برضة

لكن ظروف طرأت خارج السيناريو والمتوقع كان فيه امل ان السطر يكمل لآخر الصفحة ويكمل بعد الصفحة صفحات

لكن القصة وقفت عند منحنى غريب وبدون مقدمات.............مش هنخوض فى تفاصيل مش كلها بنملكها ولا نملك نحكيها

لكن كان عندى امل جديد ولسه عندى امل ضعيف ان السطر يكمل لكن وجود امل افضل من الانهزام لمجرد صعاب

ممكن يكون اغلبها من المستحيل تخطيها لكن لازم نعيش والحياة بدون امل هى موت بطيء جدا.

تفتكروا ممكن يكون املى ضايع؟ احتمال لكن طول ما القلب فيه نبض لازم يكون فيه امل حتى لو كان مستحيل

يمكن الواحد بيحب احلامه لانها كل حاجة حلوة فى حياته ومع احلامه بيعيش احلى لحظات حياته

مش هو نايم بس لكن حتى وهو صاحى بيحلم

حلمى كان بسيط ان يكون جنبى شخص حبيته مش حبيته لانه جميل الصورة ولا لانه بيعطف على او حنين لكن .....

لانها نقطة ومن اول السطر

ايوه نقطة ومن اول السطر كان بالنسبة لحياتى وقفه مهمه جدا عندها كثير جوايا اختلف

وكثير بالنسبة لى كمان اختلف حتى لون السما والنيل والشجر وصوت العصافير والحمام

تفتكرى كام مرة ممكن الواحد يجى له الفرصة دى فى حياته؟

مش هاقدر اقول غير انى ماكنتش متوقع ان حياتى كان ممكن يكون ليها شكل ولون قبل ما اعرفك

بينى وبينك مسافات واطوال لكن القلب ما يعرفش المسافات والاطوال ولا يفهم الفروق

لغة القلب بتكون واحدة بين البشر كلهم وكل قلب عارف بصلتة واتجاهاته واضحة جدا

اشاراته بتبان فى دقاته ماحدش يقدر يقول ماعرفتش او مش ممكن

القلوب ماعندهاش مستحيل

العوائق والحواجز من صنعنا احنا والمسافات احنا بنخترعها نفرق بيها بين بعضنا

لكن مهما كانت الحواجز عاليه وسميكة والمسافات طويلة ومتعبه

القلب بيخترقها كلها فى لحظات حتى لو كان فى الصين

نقطة فى حياتى وقفت عندها ومش عارف اعدى عليها واسيبها

نقطة فى لحظة ظهرت وفى لحظة عايزة تختفى

صحيح ما استهلش ولا لى الحق فى انى اطالب باكثر من عطف

لكن قلبى بينادى عليكى ومستنى رد .

حتى لو طال الانتظار لباقى العمر هتفضل نقطة كبيرة فى حياتى مش ممكن ابدا اعديها واسيبها

ما انا ماصدقت لقيتها ومش طالب غير عطف واحسان حتى لو كانت نقطة اهى برضة تبل ريق على الماشى

مش بس بحبك ولا مجرد انى مشتاق لك ولا انى مش قادر على بعدك

لكن اللى جوايا اكبر من الحب واقوى من الشوق واصعب من العادة

نقطة كبيرة حولت حياتى من الضلمة للنور فى لحظة اتكعبلت فيها من غير ميعاد

وكانت بداية جديدة لانسان قديم منسى من زمن تحت ركام التاريخ هو نفسه كان ناسى انه انسان

كان ناسى ان عنده قلب وبيدق ومحتاج يحب

يا نقطة ......

ما تحرمنيش من وجودك اخر السطر ولا بعطفك على حروفى ولا حنوك على صفحاتى

صدقينى حبيتك حتى وانا عارف انك مش هاتحبينى زى ما بحبك

لكن سبينى احبك ومش طالب غير احسانك وحنانك

هى ابسط من نقطة واقوى من فيضان واحن من ام