من موقع الحدث اكتب اليكم هذا التحذير
كنت اود احدثكم عن شيء اخر ولكن الاحداث لا تترك خيارا اخر
هذا الصباح ذهت الى عملى بالمقطم فوجئت بحالة هرج ومرج ومن يجرى يمينا ويسارا لم اعط اهتماما قلت انها استعدادات لزيارة الوفد الاجنبى غدا ودخلت المكتب كل شىء كما هو
- صباح الخير يا جماعة
رفعت سماعة التليفون وطلبت البوفيه
- صباح الخير يا شباب ايه الاخبار فين القهوة والمياة الساقعة بتعتى
اصل انا بحب المياة تكون ساقعة حتى فى طوبة ودرجة الحرارة 20 تحت الصفر
- صباح الخير يا باشمهندس... انت هتشرب قهوة برضة؟!
- ايوة يا بنى ايه المشكلة؟! ايه ما فيش بن؟
- لا فيه بس المية
- مالها المية؟
- بيقولوا فيها تسمم
- يا ابنى حرام عليكوا كل حاجة تجيبوا اللوم على المية؟ هو انتوا دايما ما تصدقوا اى حجة علشان تقعدوا ما تعملوش حاجة.
- لا يا باشا اصل فيه 20 واحد اغم عليهم وودوهم المستشفى وباعتوا يجيبوا الاسعاف
- اسعاف مرة واحدة ! 20 واحد فى حالة اغماء! انتا متاكد من اللى بتقوله؟
- ايوة حتى اسال كدة فى الادارة فوق
اصل احنا مكتبنا فى الدور اللى تحت الارض يعنى مخفى عن عيون الحساد بعيد عنكم
ما كدبتش خبر طلعت فوق لقيت ناس بتجرى يمين وشمال حاجة غريبة بجد .... سالت قالوا لى انه فية 9 راحوا المستشفى وبيهلوسوا منهم واحد عزيز على جدا الصراحة اتخضيت عليه لانه ضعيف ما بيستحملش عطسة برد مسكت الموبايل وطلبتة
- الوه انت فين
- الوه ايوه هو بقى احسن دلوقت
- انت مين ؟
- انا فلان
- ايه اللى حصل
- هو احسن بس لسة مش عارفين ايه اللى الحصل له فجأة كان بيشرب ميه وقع اغم عليه ودلوقت هو فى المستشفى بس بقى احسن لكن هيودوه مركز السموم
يا نهار اسود ومهبب بهباب الموضوع كبر سالت واحد معانا قال لى ان الناس التانية كمان بعتوهم مركز السموم وان فيه حالات تانية من مدارس فى المقطم وان الحكاية مش من عندنا لكن واضح انها ضربة مركزة للمنطقة كلها وغالبا ان الميه فعلا فيها حاجة مش مضبوطة والى ان يتضح الامر سنتعامل من بعيد مع الميه.
اخوانى الاحباء المشكلة مش مجرد حادث مفاجيء لكن المشكلة اكبر من كدة الحكاية دى ابتدت الساعة العاشرة صباحة وانا دلوقت لسه بكتب لكم الموضوع الساعة الواحدة والنصف ولم يتم اى تحذير رسمى من الجهات المعنية.
فهل لم يتم الابلاغ؟!
اعتقد انه تم الابلاغ عن هذة الحالات عن طريق المستشفى والدليل انهم حولوا الحالات الى مركز السموم اى انه تحول من مستشفى حكومى الى مستشفى حكومى آخر.
اين المسؤل عن هؤلاء البشر؟!
اين المسؤل عن هؤلاء التلاميذ؟!
اين المسؤل عن هذة الحادث؟!
فى الدول الاخرى قد يحدث خطاء ما ولكن يتم التدارك السريع والابلاغ العاجل لكل المتضررين او المتوقع تضررهم عن الحادث لانه لا افلات من الحوادث القدرية ولكن الاحتراز لمثل تلك الحوادث، انا لا احمل شخص معين السبب ولكن احمل كل من هو فى موقع مسؤلية نتيجة الحادث وليس الحادث نفسه لانه لم يتخذ اى اجراء رسمى من اى مؤسسة حكومية حتى بعد ان تم التاكد انها حالات تسمم اما الاسبب لم يتحرك احد لمعرفة السبب بل كل الاجراءات التى اتخذت هى من قبل المؤسسة التى اعمل بها وهى قطاع خاص اى ان صاحب المال نفسه هو الذى اهتم وتحرك وبعث لاخذ عينات من المياه للتحليل ومعرفة ان كانت هى السبب ام لا.
انا اعيب هنا على القطاع الحكومى الذى لم يتخذ اى اجراء قوى فى هذا الحادث هل ينتظرون ان يموت احدهم ثم يتخذون اجرءاتهم؟! ام انهم يعرفون مسبقا ان هناك مشكلة ما ولا يريدون ان يحاسبهم احد على اهمالهم على اساس انها حادثة قدرية؟!
انه شىء مؤسف ان يصل بنا الحال الى تلك الحالة المذرية من الطناش وتكبير الدماغ.
اننا نسير فى منحدر كبير وخطير ارجوا ان نفيق قريبا لانه ليس هناك الكثير من الوقت كى ننتظر من يقيمنا من موتنا.
اعزائى الساعة الآن الثانية والنصف آخر الاخبار انه من مدرسة اخرى يوجد 40 حالة وكلهم من المرحلة الابتدائية واخيرا وزارة الصحة بعثت بمندوب لاخذ العينات من المياه وتحليلها.
مبروك الناس بدات تصحوا من غفوة او سكرة النوم
