البداية والنهاية

البداية والنهاية لا احنا عارفنها ولا احنا لينا يد فيها
ابتديت امتى؟.......مش عارف
فى لحظة ما اختارتهاش
ها تنتهى امتى؟ ..........
فى لحظه مش عارفه
يوم البدايه ما لكش يد فيه لكن ابتديت ومشيت فى طريق
جايز ما اخترتش الميعاد لكن فى ايدك تختار الطريق
حتي لو كنت ماشى فى طريق
ممكن تغيره
ما حدش يقدر يجبرك على طريق لكن انت تقدر تجبر نفسك على طريق
غريب الكلام؟
لا مش غريب ..
ساعات كثير بنجبر نفسنا على حاجات مش عايزنها لكن بنعملها
بتعملها ليه؟......
علشان حد بتحبه او علشان حاجة بتحبها
جايز تكون ننفسك تعمل كده
الاكيد فى كل ده ان ممكن تعمل حاجة مش عايزها
انت حر
ساعات انت بتختار طريق وتعمل حاجات تانى علشان لازم تعمل كده
اخلاقك وتربيتك تفرض عليك كده
يعنى هو انت ناقص؟!
الناس كمان تتحكم فيك وتصرفاتك
شيء يخنق
عندك حق لكن ما تنساش انت هنا مش لوحدك
بس تعرف لما بتعمل حاجة الناس عايزاها وتشوف فى عنيهم الفرحة
بتنسى انك كنت مجبر على كده بتكون فرحان يمكن اكثر منهم
لما بتشوف طفل مزقطط
بتنسى الدنيا وما فيها
لما بتشوف نظرة امتنان من ست كبيره او راجل كبير ساعدته
ان شالله حتى اديته كوباية مايه
بتحس انك عايز تديله الدنيا
انت عايز ايه؟
الدنيا ماشيه وابتدت من فتره
انت رايح فين؟
طب والنهاية؟
نهايتك فين؟
انت عايز ايه؟
عرفت بدايتك..ونهايتك عملت حسابها؟
لسه زى ما انت وحيد وسط الناس وحدك عايش حزنك
حتى وسط العيال عيل وبتلعب لكن جواك وحيد
امتى بقى يجى يوم وتلاقى شريك يشاركك حلمك

يا عم حلم مين ما خلاص بطلنا احلام من زمان
انت لسه فاكر ان العمر فيه حلم؟
تبقى واهم
مهما كانت النهاية
تفرق ايه طول ما انت وحيد
تفتكر فيه حد هيسال عنك؟
حتى الحبايب باعوك وسابوك على الطريق
زى لقمه مسنوده على الرصيف
وقعت من حد سندها يمكن تلاقيها قطه ولا كلب
تصدق.. حتى الكلاب والقط
سابوك وحيد مرمى على الطريق
كان ايه لزومها البدايه لما النهايه مقربه من بعيد وانت وحيد
العمر بيجرى
ما يجرى هو ليه نهتم؟!
انت باين عليك عايش فى وهم
اخريتها هم شوية تراب وبعدين خلاص
اهو كلب وراح
تفتكر حد هيفتكر؟
ولا حد ممكن يقول كان فيه حد هنا
ابدا
ولا حتى الورق ده له لزوم .....
تفتكر حد ها يقرا
طب وهيتعب نفسه ليه ما هو كلام زى اي كمان بيتقال
يعنى هو حد كان بيسمع قبل كده لما يقرا بعد كده
يا عم خلاص ما هى نهايتها كده
ما فيش مفر
زى ما ابتديت وما حدش سمع بيك
هتنتهى وما حدش هيفتكر يسال فيك
صدقنى يمكن حتى ما تلاقيش حد يلفك فى شوال وفى الطريق يرميك
جايز يسيبوك لغاية ما تيجى الطيور تاكلك وتخلص عليك
هو انت ليه مهتم كده ما هي ماشية وها تخلص وخلاص
انت يعنى شايفنى ناقص كلامك
يا عم ريح كده على جنب وسيبها تخلص زى ما تخلص وخلاص
هى الدنيا كده تبتدى وقت ما هى عايزه وتنتهى وقت ما هى عايزه
وانت لا ليك فى ده ولا فى ده
عيش بس انت الشوية دول وخلاص
بس اوعاك تفكر تتجنن وتعمل زى ما الناس ما بتعمل
وتفكر انك تبدى من الاول تانى
لاء وهو انا مجنون
هو بعد ما يروح هيرجع تانى
زى القلم الرصاص يتبرى ويخلص
لحد ما يبقى عقله وبعد كده ترميه
ما خلاص خلص
ارميه بقى
ارميه وما تسالش عليه